Eva Maria Leuenberger (1991, Berna) viva a Bienna ed ha studegià a l’Universitad da Berna sco er a la Scola auta dals arts da Berna. L’onn 2019 è cumparì ses debut dekarnation (Droschl) ch’è vegnì undrà il 2020 cun il premi da lirica da Basilea. Eva Maria Leuenberger ha plinavant retschavì dus premis da litteratura da Berna (2020 e 2022), l’Orphil-Debütpreis da la citad da Wiesbaden (2020) sco er il PoesieDebütPreis Düsseldorf (2021).
Co pon ins far frunt ad ina catastrofa smanatschanta che cumpiglia tut il mund e l’ambient? Smatgà en tranter culpa ed inabilitad da gidar sasez para il «flügchen», questa pitschna existenza vulnerabla, l’emprim dal tut exponì a ses destin. Cun letargia e lamentaziuns n’èsi dentant er betg gidà. En sia poesia lunga die spinne splega Eva Maria Leuenberger cun in sguard plain ligerezza, cun in tschegn e tut senza pitradad e patos ina poetica dal «malgrà». Il text avra – vidvart da vanadad e vanitad – spazis linguistics, en ils quals resistenza, desideri, siemi e curaschi paran puspè d’esser pussaivels. I n’è nagin pitschen confiert ch’ins na sto betg renunziar ni a la lingua poetica ni a la speranza, er sch’il desaster smanatschant para d’esser inevitabel.
