Dapi in decenni portan las Sofalesungen / Lectures canap / Letture sul sofà la litteratura en via directa tar la glieud a chasa: stivas privatas daventan temporarmain saluns da litteratura publics. En il rom d’in program pluriling tgirà cun premura vegnan auturas ed auturs cun lur moderaturas e moderaturs entamez ils quartiers. Ospitantas ed ospitants avran lur abitaziuns, creeschan cun lur mobiglias ina cuminanza divertenta, envidan il vischinadi. Uschia vegn stgaffì in spazi per scuntradas e barats che renda accessibla la litteratura en moda persunala e nunconvenziunala. L’atmosfera intima e lucca promova il barat direct tranter auturas ed auturs ed il public. A l’ur dals lieus tradiziunals d’occurrenzas daventa litteratura uschia palpabla en il collectiv. Pli simpla na po l’intermediaziun litterara strusch esser.
Las Sofalesungen / Lectures canap / Letture sul sofà sa distinguan tras lur gust d’experimentar e lur attenziun per novas vuschs litteraras. Vidvart dals settings classics da lecturas litteraras avran ellas novs spazis, reuneschan diversas cuminanzas e promovan furmas d’intermediaziun innovativas. La diversitad dals geners preschentads – da prosa sur lirica fin spoken word – cuntanscha differents circuls dal public che pon scuvrir ed explorar qua litteratura en moda casuala e nuncumplitgada. Auturas ed auturs arrivads sco er debutantas e debutants bain represchentads n’obtegnan betg mo in palc stimulant ed in accumpagnament professiunal, mabain er in onurari gist.
L’integraziun d’ospitantas ed ospitants da la populaziun che daventan, tras quest format innovativ, sezs part da l’intermediaziun litterara gida a disfar retegnientschas ed a render palpabla la litteratura sco part dal mintgadi. Quai na promova betg mo la cultura da leger, mabain rinforza er la conscienza per la muntada da litteratura en la societad.
Ils ultims 10 onns èn las Sofalesungen / Lectures canap / Letture sul sofà che vegnan purtadas d’ina uniun d’utilitad publica sa sviluppadas tar in organisatur professiunal. Il program tgirà cun premura cuvra l’entira Svizra e promova uschia il barat intercultural e l’interess per las litteraturas da las differentas cuminanzas linguisticas. L’engaschament da plirs onns da las Sofalesungen / Lectures canap / Letture sul sofà per la litteratura e per la cuminanza merita renconuschientscha e vegn undrà cun in premi spezial d’intermediaziun.
