Premi svizzer da litteratura 2023
El è naschì a Bucarest l'onn 1969 ed è arrivà en Svizra en la vegliadetgna da 6 onns. El scriva romans, collecziuns da novellas, paraulas, raquints per uffants, gieus da teater, cronicas ed albums per uffants pitschens. El maina lavuratoris da scriver ed instruescha dapi il 2006 a l'Institut da litteratura svizzer da Bienna.
Char Eugène,
En tia brev a Nicolae cun il titel Lettre à mon dictateur ans regalas ti in bel mument d'equilibrissem litterar. Ti ta movas sin il cunfin tranter la gronda istorgia, l'istorgia pussanta che furma u che stenschenta, e la pitschna, l'istorgia particulara da quest mat rumen ch'è vegnì en Svizra en la vegliadetgna da sis onns. Plinavant resta tes text adina sin il cunfin tranter il rir e la gritta, tranter la tema ed il plaschair, tranter l'ironia e la seriusadad.
Sa drizza tia brev a tes dictatur? Gea. E na: ella sa drizza a tai ed a nus che la legiain. Ella sigilla plitgunsch la fossa dal demuni che d'al svegliar. Cunter quels che vulan furmar l'istorgia tenor il maletg da lur smesiranza, celebrescha tes text nossas maladestrezzas, noss destins, noss surrirs e nossas beffas: la vita. Malgrà il tiran, chava tia brev or las istorgias – las pitschnas, las preziusas – sco grondas resistenzas poeticas. Per quai t'engraziain nus, char Eugène.
La giuria federala da litteratura 2022
Editions Slatkine,2202
