Premis svizzers da litteratura 2021
Levin Westermann è naschì l'onn 1980 a Meerbusch en Germania. Suenter ses studi da filosofia e da sociologia a l'Universitad da Francfurt terminescha el sia scolaziun a l'Institut svizzer da litteratura a Bienna, l'onn 2012. El dat en egl cun sia qualitad poetica e gudogna l'onn 2014 per ses emprim tom da poesias unbekannt verzogen il premi da lirica «Orphil» e l'onn 2020 per bezüglich der schatten il premi Clemens-Brentano.
En la cumposiziun da quatter parts Bezüglich der Schatten da Levin Westermann sa maschaidan realitads cuntracurrentas. Instanzas pledadras – nus, ina vulp, Anne Carson, Roland Barthes u Dieu – han ina basa postapocaliptica, mantegnan dentant lur umor e lur calma, perquai ch'igl è insumma memia tard. Or d'ina sfera acustica atemporala vegnan dilucidadas dumondas existenzialas. Ma i resta intschert, sch'ins entra en il lieu d'acziun suenter la festa u suenter la fugia.Cun in'eleganza autamain poetica sa maschaidan qua las categorias: tranter lirica e minidrama, tranter uman ed animal, tranter social media e causas primaras mitologicas.
Matthes & Seitz
ISBN 978-3-95757-781-8
