Premi svizzer da litteratura 2024
Jérémie Gindre è naschì l’onn 1978 a Genevra. L’onn 2001 ha el fatg il diplom da la Scola Auta d’Art e da Design da Genevra. Sia activitad artistica cumpiglia il dissegn, la sculptura, l’installaziun ed il scriver. El explorescha temas fitg divers sco per exempel la furmaziun d’urizis u il viandar en muntogna. Sia ovra visuala è exponida en numerusas gallarias – a Berlin, a Genevra u a Losanna.
Tombola da Jérémie Gindre sa cumpona da set novellas; set raquints che sa differenzieschan sin basa da la lunghezza, dals lieus e dals protagonists, ma ch’èn colliads in cun l’auter tras divers ecos e tras numerusas coerenzas: la medema attenziun spargnusa als detagls d’ina descripziun, ina distanza curiusa tranter la vusch che raquinta ed ils persunagis, ina predilecziun per l’anecdota, da la quala il senn prenda suramaun e disturba il decurs calm dals eveniments, e tranter las lingias, ina nonchalance discreta e delicata che na lascha betg da la vart l’umor e che po per exempel interrumper ina istorgia sco quai ch’ina «starnidada po interrumper ina frasa».
Questa ovra ha la qualitad rara da furmar ina collecziun, d’esser dapli che la summa da sias parts, d’ans envidar ad ans perder, ad explorar u a scuvrir, d’in raquint a l’auter, co che lur significaziun sa modulescha tut tenor lur connexs. A questa tombola gudognan tant l’autur sco er las lecturas ed ils lecturs in grond premi. El, in premi, e nus ina poetica da la nianza.
Éditions Zoé, Genf, 2023
