Isabelle Sbrissa

Isabelle Sbrissa

Premi svizzer da litteratura 2022

Isabelle Sbrissa è naschida l'onn 1971. Ella ha studegià a la Scola auta dals arts da Berna e scriva tocs da teater e poesias. Cun sia micro chasa editura «disdill» ha ella publitgà poèmes poèmes1 (2013) e la revista La feuille. En las éditions NOUS è cumparì Ici là voir ailleurs (2018). Ella viva ad Undervelier (JU).

«tout tient tout»

Gia a partir da l'emprima egliada vesain nus en tout tient tout d’Isabelle Sbrissa duas scripziuns da differenta furma. L'ina è fluida, senza interrupziun, senza punctuaziun, ina quasi-prosa cun ina sintaxa indefinida. Ella pledenta ils senns. Ins vesa ed ins auda, tant dadens sco er dadora, ins senta ils conturns: iert, guaud, naiv u mustgas. L'autra scripziun staglia la lingua independentamain dal senn. Ils pleds per part tratgs dapart, che vegnan chatschads a lur limitas, laschan sin la pagina uschiglio alva ina chava verticala che segna in ur, davent dal qual la scripziun sa reflectescha.
Ma i dat bler dapli ch'il «tut» d'ina scripziun ed il «tut» da l'autra scripziun. I dat lur inscunter en il cudesch che las unescha e che las tegna ensemen. Tranter ellas datti numerusas passaschas da pleds, da motivs, da salids e da renconuschientschas. Il titel l'ha annunzià: tout tient tout – tut tegna tut. Per la lectura u il lectur n'è questa frasa ni ina simpla constataziun ni in'utopia vana, mabain è daventada in'experientscha poetica.

héros-limite, 2021