Fabienne Radi, naschida l'onn 1960 a Friburg, fa ediziuns d'art (cudeschs, placats, DCs) ed instruescha art figurativ a la Haute école d'art et de design (HEAD) a Genevra. Da sia emprima scolaziun en geologia deriva sia amur per differentas stresas, ina curta excursiun en la biblioteconomia ha sveglià sia fascinaziun per classificaziuns ed il studi tardiv d'istorgia d'art ha midà sia vista sin ils objects dal mintgadi. Ella viva a Genevra e sa trategna savens en la regiun Gruyère (FR).
«Email diamant»
En 32 raquints – tants sco ils dents en la bucca d'ina scriptura, per la quala il rir n'è betg in pled vid – pratitgescha Fabienne Radi la discrepanza murdenta ed il sigl da patratgs murdent.
Essais, experientschas vividas, critica da films, gieus omofonics e raquint da famiglia: sias istorgias maschaidan il burlesc ed il patetic cun in senn per il concret ch'è tipic per questa autura ed artista. En ses texts betg classifitgabels s'inscuntran David Bowie e Roland Barthes ed ins chatta lien er in zic da Perec. In'experientscha litterara da las banalitads che vegnan rendidas brigliantas cun agid d'ina politura fitg comica.
