Christoph Schneeberger è naschì l'onn 1976 en l'Argovia ed è creschì si a Vogelsang ed a Birr. L'emprim ha el studegià a l'Institut svizzer da litteratura a Bienna e l'onn 2018 ha el obtegnì il master en scrittira litterara a la Scola auta dals arts a Berna. Christoph Schneeberger cumbina ils differents secturs da l'art ed è activ en furmas ed identitads multifaras. Sco X Noëme – uschia sa cloma el sco drag queen – fa el ina performance durant la prelecziun da ses roman premià Neon Pink & Blue.
Per questa biografia tranter las schlattainas chatta la vusch narrativa ina forza linguistica tut atgna, da l'autra vart da la grammatica d'ina punctualitad objectiva, numnadamain ina pedantaria materialistica – il neutrum neon per uschè dir. Il diever permanent dal conjunctiv s'oppona, metta en dumonda l'identitad da l'indicativ e lascha implodar ils usits, las tschertezzas ed ils geners litterars. En in dialog cun Walser e cun Rousseau, cun Heine e cun von der Heide sco er cun chanzuns dialectalas e cun la tradiziun da chanzuns popularas resulta ina tschertga dal jau, in'experientscha da sasez ed ina incarnaziun a pliras vuschs e transsexuala. Il fil blau èn las posas e las mascras, l'esser a travers e travestì sco er il caracter provisoric e precar da mintga existenza umana.
