La Vallesana Catherine Lovey è naschida il 1967 en ina famiglia da purs da muntogna. Suenter ses studis da relaziuns internaziunalas cumplettadas cun in diplom en criminologia ha ella lavurà sco schurnalista da pressa scritta, spezialisada sin dumondas economicas e finanzialas. L’onn 2005 ha ella publitgà ses emprim roman L’Homme interdict (Zoé). Per sia ovra histoire de l’homme qui ne voulait pas mourir ha ella retschavì il Prix Alice Rivaz, il Prix Michel Dentan ed il Prix de l’Académie nationale de médecine.
In inscunter improbabel a l’entschatta: tranter la narratura che va a star en ina nova immobiglia e ses vischin, Sandor, in um plitost misterius. Il cancer da Sandor sco er la pandemia chaschunan tranter els dus inscunters ch’èn descrits en in rapport tant elegant sco deschent. Sandor è in uman profundamain liber ed attaschà a la vita. Quai n’al incitescha betg da snegar sia malsogna, mabain da refusar en tutta serenitad bunamain fin a la fin la pussaivladad da murir. La narratura respecta questa decisiun cunter sia veglia; e questa maschaida d’intimitad e distanza tranter els è captivanta. Quest roman è caracterisà ordvart da dultschezza e transmetta emoziuns gist uschè fermas.
