Premi svizzer da litteratura 2023
Lioba Happel è naschida l'onn 1957 ad Aschaffenburg. Ella ha studegià lavur sociala, pedagogia sco er litteratura tudestga e spagnola dal temp tempriv e modern a Berlin. Per sias publicaziuns da lirica e da prosa ha ella retschavì numerus premis e stipendis. Ella viva a Losanna ed a Berlin.
Tge per ina vusch, quest Pommfritz, tge per in fegher! Sche negligi, bandunà u tradì – ina victima na vul questa figura en mintga cas betg esser. Sco figl pers e sco pseudocannibal, sco admiratur da Rimbaud e sco amant impetuus sa tegna «Pommi» sur l'aua en in mund ch'al na dat strusch schanzas.
A Lioba Happel reusseschi cun quest roman da stgaffir in grotesc da lingua potenta e profundamain uman. Pommi fa frunt a las sfidas da sia existenza cun forza e cun umor sco er cun ina voluntad enorma da sa far valair. Sia fom per litteratura, per renconuschientscha e per vita sviluppa in sound che resuna ditg. Monster u Dieu – tgi po decider quai?
edition pudelundpinscher, 2021
