Premi svizzer da litteratura 2022
Dana Grigorcea è naschida l'onn 1979 a Bucarest, Rumenia. Ella ha studegià filologia tudestga ed neerlandaisa a Bucarest, reschia a Brüssel e schurnalissem a Krems, Austria. Ses emprims dus romans han survegnì numerus premis litterars. Ella scriva reportaschas ed essais per la Frankfurter Allgemeine e per la Neue Zürcher Zeitung sco er cudeschs d'uffants e romans. Ella viva a Turitg.
La narratura da quest roman burlesc e grotesc ans maina en l'istorgia ed en il preschent da la Rumenia, là, nua ch'ils tschitschasang na moran betg: betg mo il cont Dracula, arsentà da sang e mort vivent «turistifitgà», mabain er il spiert dal tiran Ceauşescu gira en il mund post-communistic, nua che despotissem ed engurdientscha da gudogn resistan sco incarnaziun dal vampirissem inevitabel. Cun ses text tant politic sco poetic scuvra Dana Grigorcea realitads ed absurditads, maschaida – cun passiun – critica dal temp, mitus e poesia. Ella stgaffescha in realissem magic e murdent che fa snuir: Quels che na moran betg na sa zuppan betg mo en la Transilvania.
Penguin Verlag, 2021
