Ariane Koch, naschida l'onn 1988 a Basilea, ha studegià tranter auter art figurativ ed interdisciplinaritad sco er in pèr semesters filosofia e teater a Basilea ed a Berna. Ella scriva texts da teater, da performance e da prosa – savens en collavuraziun cun la gruppa da teater GKW (Moïra Gilliéron, Ariane Koch e Zino Wey). Ils tocs da GKW èn vegnids represchentads e premiads numerusas giadas. Die Aufdrängung è ses roman da début. Ella viva a Basilea.
«Die Aufdrängung»
En Die Aufdrängung inscenescha Ariane Koch in inscunter cun l'ester e cun l'imprevis entaifer in mund da l'usità e da l'ordinari. En ina moda tant intelligenta sco comica enritgescha la narratura pass per pass la descripziun da ses giast, e quai senza preschentar ina imaginaziun clera. Il giast è in fantassem ed ina currella, ma el è er in corp cun basegns ed ina persuna cun pretensiuns. Tar mintga nova tentativa d'al dumagnar linguisticamain turbla la narratura er las conturas da sia atgna identitad, da sias intenziuns e da sias tenutas. L'autura taissa las differentas episodas dal roman ad in entretschament artistic che tracta in tema da gronda actualitad cun ina mirveglia ludica e cun observaziuns libras da dogmas. Sin la ballantscha tranter il concret e l'indissolvibilitad da l'imaginaziun avra ella spazis linguistics, en ils quals betg mo la relaziun tranter las figuras, mabain er la relaziun tranter lingua ed object vegn adina puspè definida da nov.
