Schweizer Bibliotheken für Seh- und Lesebehinderte

BIBLIOTHEKEN

Bibliothèque Sonore Romande (Lausanne),
Bibliothèque Braille Romande et Livre Parlé (Genève),
SBS Schweizerische Bibliothek für Blinde, Seh- und Lesebehinderte" (Zürich)
Biblioteca Braille e del libro parlato, (Tenero)

Premi spezial d'intermediaziun 2021

Il premi spezial d'intermediaziun 2021 dal UFC undrescha l'engaschament da quatter instituziuns svizras a favur da la lectura. Il premi va a la Bibliothèque sonore Romande (BSR) a Losanna, a la Bibliothèque Braille Romande et livre parlé (BBR) a Genevra, a la SBS Biblioteca svizra per umans tschorvs, per umans impedids da la vesida e per persunas che han difficultads da leger a Turitg ed a la Biblioteca Braille e del libro parlato a Tenero.

Spezialpreis / BIBLIOTHEKEN
© BAK / Julien Chavaillaz

Duas da questas bibliotecas èn vegnidas fundadas il cumenzament dal 20. tschientaner e mintgamai ina dad ellas a la fin dals onns 1940 e dals onns 1970. Las bibliotecas emprestan cudeschs, revistas, material d'infurmaziun tar votaziuns ed elecziuns, recepts da cuschinar, ed ina dad ellas schizunt notas musicalas. Las instituziuns èn s'adattadas a la transfurmaziun tecnologica. Ultra dad ovras en la scrittira per tschorvs porschan ellas er differents audioformats, cudeschs electronics, films e serias cun audiodescripziun ed apps da lectura. Persunas da tut las vegliadetgnas che na pon betg leger pervia d'impediments da la vesida, pervia da difficultads da leger, pervia da malsognas neurologicas u per auters motivs, survegnan ina cussegliaziun persunala e quellas medias che correspundan a lur basegns.

Spezialistas e spezialists da litteratura, da documentaziun e d'infurmaziun han cumpilà in catalog cun millis da cudeschs, als quals pledadras e pledaders en uffizi d'onur han emprestà lur vusch. Romans criminals, istorgias romanticas d'eroxs e cumedias, texts spezialisads, ovras classicas, cudeschs per giuvenils u texts erotics vegnan purschids en las linguas naziunalas ed en englais sco er en differents idioms rumantschs. Ils contacts da las bibliotecas cun instituziuns sumegliantas en Svizra ed a l'exteriur faciliteschan a las abunentas ed als abunents d'acceder ad autras collecziuns.

La lectura è la colliaziun cun autras persunas e cun sasez. Ella surventscha las distanzas culturalas e geograficas. Las quatter bibliotecas undradas permettan, sco intermediaturas, a las persunas che han difficultads d'acceder a cudeschs pervia da lur impediment, tuttina d'appartegnair dal tuttafatg a la cuminanza da las amaturas e dals amaturs da lectura e da litteratura.