Premi svizzer da litteratura 2024
Ed Wige è naschida l’onn 1984 ed abitescha a Losanna. Ella ha studegià relaziuns internaziunalas e silsuenter a l’Institut da litteratura da Bienna. Dapi lura sa deditgescha ella al scriver. Ella s’interessa per il scriver cun dapli che dus mauns ed è commembra da differents collectivs litterars sco per exempel AJAR u Particules. Milch Lait Latte Mleko è l'emprim cudesch ch’ella ha publitgà suletta.
Ed Wige inventa ina fugia sco preistorgia e raquinta dal mintgadi d’ina mattetta da l’Ex-Jugoslavia ch’è vegnida en Svizra cun sia mama, ch'è sfurzada da crescher si tranter ils grüezi ed ils bitte schön en la sumbriva sco in spiert da ses bab, ch’ella ha vesì – causa la guerra – en la Tagesschau. Dar ina vusch litterara a l’uffanza è adina ina sfida, ma la scriptura fa frunt a questa sfida, tranter innocenza e violenza, cun in’eloquenza che sa mussa qua extraordinariamain lapidara ed è perquai tant pli remartgabla. Uschia daventa in pitschen roman mintgatant grond.
Paulette éditrice, Lausanne, 2023
