Premi svizzer da litteratura 2024
Claudia Quadri viva a Lugano, nua ch’ella è naschida l’onn 1965. Ella lavura sco schurnalista per il radio da la Svizra taliana e sco cineasta da films documentars per la televisiun. Dapi l'onn 2000 ha Quadri publitgà 5 romans ed ha survegnì per sia ovra litterara plirs stipendis e plirs premis. Ses cudesch «Suona, Nora Blume» (Edizioni Casagrande, 2013) è vegnì undrà cun il Premi svizzer da litteratura 2015.
L’ultima publicaziun da Claudia Quadri è in curt roman autobiografic che cumpiglia ina seria d’exploraziuns dal mintgadi da la vita da l’autura. Ils 28 chapitels cuntegnan anecdotas, pitschnas istorgias, reflexiuns e regurdientschas. L’autura ans raquinta da l'hotel da famiglia a Paradiso che vegn demolì successivamain e da tut ils animals gronds e pitschens che l’han accumpagnada durant sia vita. Cun ina lingua raffinada che na daventa mai sentimentala e ch’exprima en moda efficazia e sensibla la fluenza dals patratgs da la narratura, grazia ad expressiuns da la lingua da mintgadi, grazia a terms dialectals ed a pleds en franzos e tudestg (las linguas dals giasts da l'hotel) descriva l’autura, raquintond da chaussas ordinarias, las transfurmaziuns profundas da la regiun en il decurs dal temp.
Casagrande, Bellinzona, 2022
